Whit wey does the engine say Toot - toot ?
Is it feart to gang in the tunnel ?
Whit wey is the furnace no pit oot ?
When the rain gangs doon the funnel ?
What'll I hae for my tea the nicht ?
A herrin', or maybe a haddie ?
Has Gran'ma gotten electric licht ?
Is the next stop Kirkcaddy ?

There's a hoodie - craw on yon turnip - raw !
An' sea - gulls ! - sax or seeven.
I'll no fa' oot o' the windae, Maw,
It's sneckit, as sure as I'm leevin'.
We're into the tunnel ! we're a' in the dark !
But dinna be frichtit, Daddy,
We'll sune be comin' to Beveridge Park,
And the next stop's Kirkcaddy !

Is yon the mune I see in the sky ?
It's awfy' wee an' curly.
See ! there's a coo and a cauf ootbye,
An' a lassie pu' in' a hurly !
He's chakkit the tickets and gien them back,
Saw gie me my ain yin, Daddy.
Lift doon the bag frae the luggage rack,
For the next stop's Kirkcaddy !

There's a gey wheen boats at the harbour mou'.
An eh ! dae ye see the cruisers ?
The cinnamon drop I was sookin the noo
Has tummelt and' stuck taw ma troosers......
I'll sune be ringin' ma Gran 'ma's bell,
She'll cry, "Come ben, my laddie."
For I ken mysel' by the queer like smell
That the next stop's Kirkcaddy !

Back to Resources